وحيد خليلودزيتش وقع مع نانت وجبد المغرب عوتاني
المدرب وحيد خليلودزيتش اللي كان مدرب المنتخب المغربي ما بين 2019 و2022، تفرّق مع الجامعة المغربية قبل غير بشهور قليلة من انطلاق كأس العالم 2022 فـ قطر. هاد القرار خلّى المدرب البوسني متحسّر بزاف، حيث هو اللي كان صعّد “أسود الأطلس” لهاد المنافسة.
ودابا من بعد ما تقدّم رسمياً كمدرب جديد ديال نادي نانت، رجع “كوتش وحيد” هضر مع راديو RMC الفرنسي
ومنذ 2022، منين خلا تدريب المنتخب المغربي، ما درّب حتى فريق آخر. وقال أنه فكّر بزاف قبل ما يقبل يرجع يدرب نانت، ولكن فالأخير قرر يرجع للنادي اللي سبق ليه درّبو فموسم 2018-2019.
وقال:
“هاد النادي ديالي. علاش رجعت؟ بزاف ديال الناس تساءلو نفس السؤال، وحتى صحابي قالو ليا ما فاهمينش. فالأول منين تاصلوا بيا قلت لا! ولكن بقاو كيلحو عليا. أنا كنحب هاد النادي وبزاف ديال صحابي كاينين هنا. جيت حيت خدمت هادي اعوام هنا ، وكانت حتى واحد المأساة عشتها مع وفاة اللاعب الارجنتيني إيميليانو سالا).
كاين اللي كيقولو عليا قديم … ولكن أنا تسرقو ليا ثلاثة المشاركات ديال كؤوس العالم. حيت عندي شخصية ديالي وكنفتاخر بها. المرة اللي فاتت منين خرجت من نانت ما كانش بسبب النتائج، وخرجت حتى بلا تعويض. دابا رجعت غير باش نحاول نعاون نادي نانت وننقذ النادي.”
وحيد خليلودزيتش فعلاً فوّت عليه ثلاثة ديال كؤوس العالم رغم أنه كان هو اللي أهل المنتخبات ليها. واحد الحاجة اللي كيشوفوها بزاف بحال “نحس” غريب فالمسيرة ديالو.
حيت تفرّق معاهوم قبل ما تبدا البطولة مع منتخب ساحل العاج فـ كأس العالم 2010، ومع منتخب اليابان قبل كأس العالم 2018، وكذلك مع المنتخب المغربي قبل كأس العالم 2022.
